རྒྱལ་པོ་ཁྲི་སྲོང་ལྡེའུ་བཙན་གྱི་བླ་སྨན་དགུའི་ནང་ནས་གཅིག་དོལ་པོ་པ་ཡིན།

རྒྱལ་པོའི་བླ་སྨན་དགུ། མིང་གཞན་ཕྱོགས་རིགས་ཀྱི་སྨན་པ་དགུ་ཞེས་པ་ནི་བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱིས་སླར་ཡང་གསོ་དཔྱད་དར་རྒྱས་ཡོང་ཕྱིར་སྙུན་པའི་ཚུལ་བསྟན་ཏེ། བློན་འབངས་ཀུན་ལ་ཕྱོགས་རིགས་ཀྱི་སྨན་པ་སྤྱན་འདྲེན་རྒྱུར་གྲོས་བྱེད་དགོས་པའི་བཀའ་བསྩལ། ཚང་མས་གསོ་རིག་ཕུལ་དུ་ཕྱིན་པའི་སྨན་པ་གདན་འདྲེན་རྒྱུར་ཞལ་འཆམ་སྟེ་གསེར་གྱི་པ་ཏྲ་སོགས་བསྐུར་ནས་ཕོ་ཉ་བ་ཡུལ་སོ་སོར་མངགས་པའི་ཤོད་སྲོལ་གཅིག་དང་། གཞན་ཞིག་ནི་ཁྲི་སྲོང་གི་ཐུགས་དགོངས་ལ་སྔར་ཡབ་མེས་རྣམས་དང་། ཕྱིས་བདག་ཉིད་ཀྱིས་ཀྱང་གསོ་བ་རིག་པའི་བཀའ་སྲོལ་ལེགས་པར་བཏོད་པས་དར་རྒྱས་བྱུང་ཡོད་རུང་། ད་དུང་སྔོན་ཆད་མ་བསྒྱུར་བའི་སྨན་གཞུང་མཐའ་དག་བོད་ལ་དར་བར་བྱའོ་དགོངས་ཏེ་ཕྱོགས་ཕྱོགས་ཀྱི་སྨན་པ་དུ་མ་འབོད་པའི་དོན་དུ་གསེར་ལ་སོགས་བྱ་དགའ་མང་པོ་བསྩལ་ཏེ་ཕོ་ཉ་བ་སོ་སོར་བཀའ་ཡིས་མངགས་པ་ལས། འཕགས་ཡུལ་ནས་ཤནྟིཾ་གརྦྷ ཁ་ཆེ་ནས་གུཧྱ་བཛྲ།  རྒྱ་ནག་ནས་སྟོང་གསུམ་གང་བ་དང་། ཧྭ་ཤང་བ་ལ། ཧང་ཏི་པ་ཏ་གསུམ། ཏ་ཟིག་ནས་ཧ་ལ་ཤིནྟ། གྲུ་གུ་ནས་སེང་མདོ་འོད་ཆེན། དོལ་པོ་ནས་ཁྱོལ་མ་རུ་ཙེ། བལ་པོ་ནས་དྷརྨ་ཤཱི་ལ། མཐའ་བཞི་ནས་བྱོན་པའི་རྒྱལ་པོའི་བླ་སྨན་དགུ་ཞེས་གྲགས། ཞེས་དང་། དོལ་པོའི་སྨན་པས་མཛད་པ་《མི་འཇིགས་པ་བརྒྱད་ཀྱི་མཚོན་ཆ་》དང་། 《གབ་པ་གསལ་བྱེད།》 《འཚོ་འཆི་རྟགས་ཀྱི་ལེའུ།》 《རྩའི་ལ་ཉེ།》 《གཏར་ཁའི་དཔྱད།>> རྣམས་བརྩམས། ཞེས་དང་། སྡེ་སྲིད་སངས་རྒྱས་རྒྱ་མཚོས་མཛད་པའི་《ཁོག་འབུགས་དྲང་སྲོང་དགྱེས་པའི་དགའ་སྟོན་》ནང་བཅོས་ལུགས་ལྔ་བཅུ་རྩ་དྲུག་དར་ཚུལ་བགྲངས་སྐབས། ཤིནྟ་གརྦྷས་མཛེ་ནད་ནད་གསོ་དར། །ཧྭ ཤང་ཡཱ་ནས་མེ་དང་བྱུག་པ་དར། །ཙན་པ་ཤི་ལས་ཐུར་དཔྱད་ཟས་སྤྱོད་དར། །གྲུ་གུ་སེང་མདོས་རྟ་ཡི་སྨན་དཔྱད་དར། །ཁྱོལ་མ་རུ་རྩེས་ཡན་ལག་ཆག་བཅོས་དར། །དྷརྨ་ཤཱི་ལས་དུག་གི་སྒོས་བཅོས་དར། །ཞེས་པ་ལྟར་རང་རང་གི་ཁྱད་ཆོས་རྣམས་དར་བ་མཛད་དོ།།

བྱམས་པ་ཕྲིན་ལས་ཀྱིས་མཛད་པའི་གངས་ལྗོངས་གསོ་རིག་བསྟན་པའི་ཉིན་བྱེད་རིམ་བྱོན་གྱི་ལོ་རྒྱུས་ལས་དྲངས།